London iðar af lífi á tískuvikunni

Lilja Hrönn Helgadóttir lifir og hrærist í tísku í London. Þar stundar hún nám í listrænni stjórnun með áherslu á tísku við London Collage of Fashion ásamt því að halda úti tískublogginu unicornsforbreakfast.com með Katrínu vinkonu sinni. Lilja hefur í nógu að snúast á tískuvikunni sem hófst í gær. Lífið fékk hana til að deila með okkur sinni upplifun af Lundúnaborg þegar allt fyllist af fatahönnuðum, fyrirsætum og tískudrósum.

Sýningar hvaða hönnuða ert þú spenntust að sjá á tískuvikunni?

Ég er spenntust að sjá línurnar frá Meadham Kirchhoff, Holly Fulton, Michael Van Der Ham og Central Saint Martins MA catwalk sýningarnar. Ég er einning mjög spennt fyrir að sjá tísku stuttmynd frá Fred Butler sem hannar mjög skemmtilega skartgripi og aukahluti þar sem hún kenndi mér kúrs í fyrra í skólanum, en íslenski ljósmyndarinn Saga Sig tók upp myndina fyrir hana.

Hvað er að þínu mati það skemmtilegasta við að vera í London á meðan tískuvikunni stendur?

Skemmtilegast eru sýningarnar og öll flóran af fólkinu sem kemur. Aðal bækistöðvar LFW er Somerset House, sem er gullfallegt eitt og sér, en í bland við alla þessu hönnuði, sýningar og tískudrósir klæddar í sitt fínasta púss, verður staðurinn alveg ævitýralegur.

Eru Lundúnabúar mjög meðvitaðir um tísku?

Fólk í London er mjög hefbundið og 'breskt' í klæðaburði. Maður tekur kannski ekki mikið eftir þessu tískumeðvitaða fólki fyrr en einmitt á tískuvikunum, þegar allir birtast skyndilega á sama stað. Borgin er svo stór að á venjulegum dögum sérðu yfirleitt bara normið, þess vegna er þessi vika kærkomin tilbreyting tvisvar ár ári!

Ert þú að fara á einhverjar sýningar sjálf?

Já, það er nóg að gera. Sýningarnar sem ég fer á eru hjá minni merkjunum sem eru enn að vinna sér sess á LFW og vilja fá eins mikla umfjöllun og þau geta, þá leyfa þau litlum bloggurum eins og mér, og Katrínu sem bloggar líka á síðunni, að koma. Það er æðislegt að fá að taka þátt í þessari viku, og mér þykir voðalega vænt um að fá þessi boðskort sem ég fæ og ætla að reyna vera dugleg að fara á allar sýningarnar og skrifa um þær á blogginu. Það getur verið mjög erfitt að fá aðgang að sýningum stærstu tískuhúsanna, þar sem þau fá sjálfgefna umfjöllun á stærstu tískumiðlunum eins og Vogue og Style.com