Vogue myndar í Hvíta húsinu

Starfsmenn og fylgdarlið bandaríska tískutímaritsins Vogue sáust fara inn í Hvíta Húsið í Washington með mikinn ljósmyndabúnað í síðustu viku. Þetta kemur fram á vef Washingtonian. Liðsmenn Vogue voru að öllum líkindum þar í þeim erindum að mynda forsetafrúna Michelle Obama fyrir fosíðu marsútgáfu tímaritsins. Einnig vakti það athygli að ekkert var á dagskrá forsetans sjálfs var þennan daginn svo hann hefur sennilega einnig verið með í tökunni. Þetta yrði þá í annað sinn sem forsetafrúin verður forsíðufyrirsæta fyrir tímaritið.

Anna Wintour, ritstýra Vogue, lagði sitt af mörkum í kosningaherferð Obama og orðrómar voru uppi um að það ætti að gera hana að sendiherra í Bretlandi, en hún er fædd þar. Sú var þó ekki raunin, enda segist Wintour vera ánægð í starfi sínu.