Bólufreðinn Bieber - stjarnan fagnaði nýju ári með jónu

Orðstír söngvarans Justin Bieber hefur beðið hnekki eftir að hann sást reykja kannabis í nýársfögnuði. Það var bandaríska slúðurvefsíðan TMZ sem birti myndirnar.

Ljósmyndirnar voru teknar á hótelherbergi í Newport Beach, 2. janúar síðastliðinn. Þar er Bieber í góðra vina hópi en á myndunum má sjá Bieber halda á stærðarinnar jónu.

Samkvæmt heimildum TMZ var það rapparinn ungi Lil Twist sem vafði jónuna.

Kvöldið áður lést stjörnuljósmyndari í umferðarslysi þegar hann elti þá Bieber og Twist í Los Angeles.

Bieber hefur ekki tjáð sig um myndirnar. Hann birti engu að síður skilaboð á Twitter þar sem hann sagðist elska aðdáendur sína og að það síðasta sem hann vildi gera væri að bregðast þeim.