Nýdönsk í fyrsta sinn til Noregs

„Við hlökkum mikið til. Það er alltaf gaman að breyta til,“ segir Jón Ólafsson úr Nýdönsk.

Hljómsveitin spilar í fyrsta sinn í Noregi 26. janúar á næsta ári og verða tónleikarnir í höfuðborginni Ósló.

„Við vorum með tónleika í Danmörku í fyrra. Þar var fullt hús, langmest Íslendingar en eitthvað af útlendingum slæddust með. Einhver Norðmaður sem sá okkur þar var svo hrifinn að hann vildi endilega flytja okkur inn til Noregs.“

Nýdönsk hélt tónleika í Hörpu í haust til að fagna 25 ára afmæli sínu. Jón og félagar hafa ekki sjálfir gert sér dagamun til að fagna áfanganum. „Við höfum ekki haft tíma til að fagna þessu afmæli. Við förum út degi fyrr og getum þá kannski farið út að borða og haldið upp á afmælið í leiðinni.“

Nýdönsk breytti nafninu sínu í Arctic Orange þegar hún ætlaði að slá í gegn erlendis hér á árum áður. Jón segir að vissulega sé þetta mikið meik í Noregi en efast um að nafninu verði breytt.

„Ætli við myndum ekki frekar nota nafnið sem við notuðum í raun og veru, sem var Kind. En ég hugsa að við notum bara Nýdönsk. Það skilst vel þarna úti.“ -fb