Sjálflærð á hljóðfæri

Þjóðlagasveitin Ylja hefur vakið verðskuldaða athygli undanfarið en þau Guðný, Bjartey og Smári gefa út sína fyrstu plötu í dag.

"Persónulega hefur mér aldrei farið jafn hratt fram á gítar og eftir að ég byrjaði í Ylju enda eru stelpurnar snillingar á gítar og ég læri mikið af þeim," segir Smári Tarfur Jósepsson sem ásamt þeim Guðnýju Gígju Skjaldardóttur og Bjarteyju Sveinsdóttur er í þjóðlagasveitinni Ylju.

Sveitin gefur út sína fyrstu plötu í dag en hún hefur vakið athygli fyrir sérstakan og skemmtilegan stíl. Ylja var stofnuð af Guðnýju og Bjarteyju fyrir Söngvakeppni Flensborgarskólans árið 2008 en í fyrra bættist Smári Tarfur í hópinn og spilar á svokallaðan "slide-gítar".

"Ekkert okkar hefur lært á hljóðfæri og höfum við í raun fikrað okkur áfram sjálf frá fyrsta degi og notið stuðnings hvert frá öðru," segir Bjartey.

Meðlimir sveitarinnar eiga fleira sameiginlegt en tónlistina. Þau vinna öll hvert á sínum leikskólanum í Vesturbænum og nýta allar frístundir sínar í hljómsveitina.

Upptökur á plötunni, sem ber einfaldlega heitið Ylja, hófust í fyrrahaust en átta af tíu lögum plötunnar voru tekin upp í september. "Eftir smá þreifingar ákváðum við að taka upp plötuna öll saman enda fannst okkur viss tengsl á milli meðlima tapast ef við færum að taka upp hvert í sínu lagi. Við teljum það gefa plötunni mjög sterkan lifandi blæ," segir Guðný Gígja en þær Bjartey semja öll lögin á plötunni fyrir utan eitt sem er samið af Smára.

Lag sveitarinnar, Út, hefur verið sérstaklega vinsælt undanfarið og fengið mikla útvarpsspilun. Vinsældir lagsins komu hljómsveitarmeðlimum skemmtilega á óvart. "Okkur grunaði þó að þetta lag væri grípandi enda hefur það vakið töluverða lukku á tónleikum.

Persónulega hefur mér alltaf þótt þetta vel samið lag hjá stelpunum og ég er ekki frá því að sólóið sé mitt best heppnaða gítarsóló frá upphafi," segir Smári og fullyrðir að þau séu hvergi smeyk við að demba sér í jólaplötuflóðið í ár. "Aðalatriðið er að við séum sátt við útkomuna og svo er allt hitt bara bónus."