Brjáluð hliðardagskrá

Iceland Airwaves-hátíðin hefur vaxið mikið síðustu ár. Dagskráin hefur farið stækkandi og það eru seldir fleiri miðar nú en áður. Það atriði sem hefur vaxið mest er samt örugglega „off-venue“ dagskráin. Off-venue er ókeypis dagskrá til hliðar við aðaldagskrána. Hún er öllum opin og tryggir að Airwaves er hátíð allra tónlistaráhugamanna í höfuðborginni, hvort sem þeir hafa keypt sér armband eða ekki.

Hliðardagskráin í ár er hreint út sagt klikkuð. Hátt í 40 staðir bjóða upp á dagskráratriði og margir þeirra eru með þétta dagskrá alla dagana. Hliðardagskráin er oft að degi til, sem þýðir að það er hægt að hlusta á tónlist frá hádegi og fram á nótt. Eina spurningin er hvað eigi að velja. Hér á eftir fara nokkrir spennandi möguleikar:

Fimmtudagur:Fimm kanadísk bönd á Hressó frá kl. 14. Bedroom Community dagskrá frá kl. 16 á Kaffibarnum. Steindór Andersen og Hilmar Örn Hilmarsson í Hörpu kl. 17 og Shabazz Palaces og THEESatisfaction á KEX Hostel klukkan 18.30.

Föstudagur:Ásgeir Trausti á Marina Hotel kl. 12, Valdimar kl. 17 á sama stað, Of Monsters and Men kl. 18 og Tilbury kl. 19. Ojba Rasta og Ghostigital á KEX, Pascal Pinon á Kolabrautinni klukkan 16 og íslenskt rokk í strætóstöðinni í Mjódd frá 16–18.

Laugardagur:Rökkurró, Vigri, Útidúr o.fl. í Norræna húsinu frá kl. 13. Þórir Georg, The Heavy Experience, Skelkur í bringu, Nolo o.fl. á Bar 11 frá kl. 17 og Hjálmar og For A Minor Reflection á Marina Hotel frá klukkan 17.

Fyrir utan allt þetta stendur raftónlistarhátíðin Rafwaves yfir á þriðju hæð í Iðuhúsinu í Lækjargötu sömu daga og Airwaves. Þar spila allir helstu raftónlistarmenn Íslands, m.a. frá Reyk Veek, Möller, Thule og Weirdcore.