Samdi lag við ljóð mömmu

Tónlistarmaðurinn Jónas Sigurðsson samdi lag við ljóð móður sinnar Rögnu Erlendsdóttir á þriðju sólóplötu sinni, Þar sem himinn ber við haf, sem kemur út á næstu dögum.

Ragna er meðlimur í tónlistarbandi eldri borgara í Þorlákshöfn, Tónar og trix, og það spilar einmitt undir í laginu. „Mamma var búin að semja ljóð sem fjallar um að búa við hafið og mér fannst það svo fallegt,“ segir Jónas. „Ég hugsaði með mér að þetta yrði nú að vera eitt lag á plötunni. Þannig að ég samdi lag við ljóðið hennar mömmu, Tónar við hafið. Það stingur svolítið í stúf við hin lögin á plötunni en hugmyndalega þá passar það alveg.“

Aðspurður segir Jónas að mamma hans sé alveg í skýjunum yfir laginu. „Hún var rosalega glöð og þau öll í bandinu þegar þau heyrðu lagið. Það var dásamlegt augnablik þegar ég setti heyrnartól á mömmu og spilaði fyrir hana. Það er með því betra sem ég hef upplifað.“

Plötu Jónasar verður fylgt eftir með risatónleikum í Reiðhöll Þorlákshafnar helgina 19. og 20. október þar sem Lúðrasveit Þorlákshafnar kemur fram, en hún spilar undir á plötunni. Nú þegar er uppselt á fyrri tónleikana.

Allt samfélagið ætlar að taka þátt í að gera þennan viðburð ógleymanlegan, en Jónas er uppalinn í bænum. „Þetta verða flottir tónleikar með „surround“-kerfi, vídeósýningu og öllum græjum,“ segir hann og hlakkar mikið til.