Tuttugasta platan frá Kiss

Goðsagnirnar í Kiss gefa út sína tuttugustu hljóðversplötu í næstu viku. Tæp fjörutíu ár eru liðin frá stofnun rokksveitarinnar.

Tuttugasta hljóðsversplata rokkgoðsagnanna í Kiss, Monster, kemur út í næstu viku.

Hún hefur að geyma tólf beinskeytt rokklög úr smiðju söngvarans og gítarleikarans Pauls Stanley, bassaleikarans tungulipra Genes Simmons, gítarleikarans Tommys Thayer og trommarans Erics Singer.

Monster er fyrsta hljóðversplata Kiss síðan Sonic Boom kom út fyrir þremur árum. Hún var sú fyrsta í ellefu ár frá sveitinni og komst í annað sæti á bandaríska Billboard-listanum. Upptökustjóri á báðum þessum plötum var Paul Stanley. Honum til aðstoðar var Greg Collins og fóru upptökurnar fram í Kaliforníu.

Ferill Kiss hefur verið magnaður. Á þeim tæpu fjörutíu árum frá stofnun hljómsveitarinnar hafa 28 plötur hennar náð gullsölu í Bandaríkjunum [hálf milljón eintaka], sem er það mesta sem nokkurt bandarískt rokkband hefur náð. Sveitin hefur selt fjörutíu milljón plötur í Bandaríkjunum og samtals yfir eitt hundruð milljónir í öllum heiminum.

Kiss á rætur sínar að rekja til Wicked Lester, rokkhljómsveitar frá New York með Gene Simmons og Paul Stanley í fararbroddi. Þeir sögðu skilið við hina meðlimina árið 1972 eftir að Epic Records hafnaði útgáfu á plötu sem þeir höfðu tekið upp. Seinna sama ár kom Simmons auga á auglýsingu í tímaritinu Rolling Stone frá trommaranum Peter Criss. Hann byrjaði að æfa með þeim félögum og í janúar árið eftir bættist gítarleikarinn Ace Frehley við hópinn. Á sama tíma var nafninu Wicked Lester hent og Kiss tekið upp í staðinn.

Kiss hefur verið dugleg við tónleikahald bæði í Evrópu og Bandaríkjunum undanfarin ár, við góðar undirtektir hinna fjölmörgu aðdáenda sveitarinnar. Þar syngja þeir hástöfum með goðunum sínum í lögum á borð við Rock and Roll All Nite, I Was Made For Lovin' You og Lick It Up.

freyr@frettabladid.is