Áhrif frá klúbbatónlist

Önnur plata ensku poppsveitarinnar The xx kemur út 10. september. Eftirvæntingarnar eru miklar enda hlaut frumburðurinn mjög góðar undirtektir.

Þrjú ár eru liðin síðan enska poppsveitin The xx sló í gegn með lágstemmdum en grípandi frumburði sínum. Hann lenti ofarlega á mörgum árslistum það árið, þar á meðal í níunda sæti hjá Rolling Stone og öðru hér á Fréttablaðinu. Árið eftir hlaut The xx hin virtu Mercury-tónlistarverðlaun í Bretlandi fyrir plötuna.

Eftirvæntingin eftir nýju efni frá The xx er því mikil og verður forvitnilegt að fylgjast með hvernig viðbrögðin við Coexist verða.

Til að fylgja eftir síðustu plötu ferðaðist The xx til Bandaríkjanna, Japans, Ástralíu og um Evrópu og spilaði við góðar undirtektir. Meðlimirnir, þau Romy Madley Croft, Oliver Sim og Jamie Smith, sáu varla heimili sín allt árið 2010. Þegar þau sneru aftur endurnýjuðu þau kynnin við fjölskyldur og vini sína og reyndu að ná áttum.

Smith var mest áberandi meðlimur The xx á síðasta ári. Hann spilaði víða sem plötusnúður og þróaði sig áfram sem upptökustjóri. Hann endurhljóðblandaði lag Adele, Rolling in the Deep, og endurhljóðblandaði plötu bandaríska tónlistarmannsins Gil Scott Heron, I"m New Here, og kallaði hana We"re New Here. Einnig gaf hann út sína fyrstu sólósmáskífu, Far Nearer, og var upptökustjóri í lagi rapparans Drake, Take Care.

Að þessari vinnutörn lokinni hófust upptökur á nýju plötunni, Coexist. Hún er að sögn Smith undir áhrifum frá klúbbasenunni sem hljómsveitin missti af á sínum tíma, auk þess sem áhrif frá nýbylgjutónlist, Bristol-hljóminum í kringum 1995 og r&b eru enn fyrir hendi.

„Hugmyndin sem ég var með í kollinum þegar við byrjuðum að semja plötuna var ekki rétt því ég var búinn að semja tónlist fyrir Drake, sjálfan mig og annað fólk, og hafði gleymt hvernig var að vinna með hinum tveimur í hljómsveitinni. Það er allt öðruvísi vegna þess að við erum svo náin," sagði Smith um Coexist. „Að vinna saman sem fullorðnir einstaklingar var mjög krefjandi. Það hafði mest áhrif á gerð plötunnar. Við þurftum að finna jafnvægi."

freyr@frettabladid.is