Geir með trommara Simpsons

„Ég er með hluta af bestu hljómlistarmönnum Íslands, Don Randi, fyrrum píanóleikara Frank Sinatra, og einum besta trommuleikara heims sem heitir Bernie Dresel," segir Geir Ólafsson sem var við upptökur í Stúdíói Sýrlandi fyrir væntanlega hljómplötu sína í síðustu viku ásamt einvalaliði tónlistarmanna og Þóri Baldurssyni, sem stýrði upptökunum.

„Bernie hefur spilað inn á The Simpsons og The Family Guy þættina og er mjög eftirsóknarverður. Það var mikið tækifæri að fá að vinna með honum," segir hann ánægður með samstarfið og bætir við: „Þetta er risaskref fyrir mig en afskaplega lítið fyrir mannkynið."

Geir Ólafsson gerði samning við fyrirtæki Don Randi um útgáfu plötunnar fyrir tveimur árum og er hún væntanleg á haustmánuðum. „Þetta eru hlutir sem hafa verið í bígerð síðustu árin en ég hef auðvitað haldið yfir þrjátíu tónleika í Hollywood og þetta hefur vaxið með hverjum tónleikum fyrir sig," segir hann.

Titillag plötunnar er endurútsetning á laginu I'm Talking About You eftir Jóhann G. Jóhannsson og hafa þeir aðilar sem standa að baki plötunni mikla trú á útsetningunni. „Þeir hrifust strax af laginu og ætla að nota það til að kynna plötuna," segir Geir spenntur.

Platan inniheldur fjórtán endurútsetningar. Þar á meðal eru Beat it með Michael Jackson og Late in the Evening með Paul Simon.

Geir var boðið að taka lögin upp vestanhafs en vildi að íslenskir tónlistarmenn yrðu hluti af verkefninu.

„Þegar maður fær svona tækifæri finnst mér það vera skylda mín að taka upp heima því ég hef mikla trú á hljóðfæraleikurunum okkar," segir hann.-hþt