Jónas Sigurðsson tónlistarmaður fagnar væntanlegri útgáfu þriðju plötu sinnar, Þar sem himin ber við haf, á nokkuð sérstakan máta. Jónas kemur fram sex sinnum í viku í félagsheimilinu Fjarðaborg á Borgarfirði eystri næstu þrjár vikur í þeim tilgangi að kynna plötu sína. Alls mun Jónas halda átján tónleika á þremur vikum.
Jónas spilar sjálfur á gítar á tónleikunum og notar tölvu en nýtur einnig liðsinnis tónlistarmannanna Ómars Gunnarssonar, Magna Ásgeirssonar og Svavars Péturs Eysteinssonar. Aðsókn á tónleikana hefur verið góð og þó að bæjarfélagið sé fámennt hafa yfir hundrað manns sótt þá tónleika sem hafa verið fram að þessu.
„Ég hef alltaf komið fram á tónlistarhátíðinni Bræðslunni sem haldin er í Borgarfirði og fundist það ofsalega gaman og bærinn fallegur. Ég er ekki að spila á Bræðslunni í ár og þá kom upp sú hugmynd að halda samt tónleika í bænum og að prófa að spila á sama staðnum aftur og aftur og aftur," útskýrir Jónas og viðurkennir að hann hafi ekki átt von á mörgum áhorfendum á fyrstu tónleikana og því kom það skemmtilega á óvart hversu margir hafa sótt tónleikana.
Jónas hefur þegar spilað á fimm tónleikum og á því þrettán eftir. „Þetta er vissulega áskorun og þegar líður á á ég örugglega eftir að hugsa: „Hvað var ég að pæla?" En ég tek ekki bara lög af nýja disknum heldur einnig eldri lög og nokkur óútgefin. Svo hef ég fengið til mín gesti og þá spilum við lög eftir þá, þannig að ég er ekki alltaf að gera það sama." - sm
Átján tónleikar á sama stað
