Æsispennandi hrollvekja í draugaborginni Pripyat

Hrollvekjan Chernobyl Diaries er frumsýnd í Sambíóunum annað kvöld. Myndin er frumraun Bradley Parker í leikstjórastólnum.

Nokkur ungmenni fá þá hugmynd að ferðast til Pripyat í Úkraínu en íbúar borgarinnar yfirgáfu heimili sín í flýti þegar kjarnaofn Tsjernóbyl-kjarnorkuversins sprakk árið 1986 og því er borgin eins og sannkölluð draugaborg. Ungmennin fara inn á svæðið ásamt úkraínskum leiðsögumanni sínum en þegar tími er kominn til að halda heim á leið uppgötva þau að átt hefur við vélina í bíl þeirra og þau komast hvorki lönd né strönd. Hópurinn neyðist til að eyða nóttinni í þessari draugalegu borg og upphefst æsispennandi og hrollvekjandi söguþráður.

Oren Peli er framleiðandi myndarinnar og handritshöfundur hennar og er talinn vanur maður á sviði hrollvekjumynda því hann leikstýrði hinum óvænta smelli Paranormal Activity árið 2007. Peli hefur einnig leikstýrt Paranormal Activity 2, 3 og 4 ásamt hrollvekjunnni Insidious. Með aðalhlutverkin fer hópur heldur óþekktra leikara sem flestir eiga bakgrunn sinn í sjónvarpsþáttaleik. Ingrid Bolsø Berdal, Olivia Taylor Dudley, Devin Kelley, Jesse McCartney, Nathan Phillips og Jonathan Sadowski fara með hlutverk ferðamannanna ungu og Dimitri Diatchenko fer með hlutverk leiðsögumannsins. Myndin er frumraun Bradley Parker í leikstjórastóli en hann vann áður sem margmiðlunarhönnuður við myndir á borð við Fight Club.

Myndin hefur fengið dræmar móttökur hjá gagnrýnendum sem eru sammála um að hugmyndin sé góð en að leikstjórinn hafi komið henni illa til skila. Þrátt fyrir hryllilegt og draugalegt umhverfið er lítið um skrekki að mati gagnrýnendanna.