Opna Karrusel í Danmörku

Vinkonunum Sigríði Ellu Jónsdóttur, Hrafnhildi Guðrúnardóttur og Kristínu Kristjánsdóttur langaði að hrista upp verslunarflóru Kaupmannahafnar og opna verslunina Karrusel með íslenskri og erlendri hönnun í bland.

„Okkur langaði að hrista upp í vöruúrvalinu hérna en þó að markaðurinn sé stór finnst okkur hann vera frekar einsleitur," segja vinkonurnar og nú búðareigendurnir Sigríður Ella Jónsdóttir, Hrafnhildur Guðrúnardóttir og Kristín Kristjánsdóttir sem opna verslun í Kaupmannahöfn á næstu dögum.

Búðin nefnist Karrusel og hafa vinkonurnar tryggt sér verslunarhúsnæði á besta stað í bænum, nánar tiltekið í hliðargötu frá Strikinu. „Við ákváðum að kýla á þetta þegar við vorum allar fluttar út til Kaupmannahafnar en þetta hefur lengi verið í umræðu í vinahópnum hérna úti. Við höfum allar mismunandi reynslu að baki og smellpössum saman sem viðskiptafélagar," segja stúlkurnar en búðaropnunin hefur verið í bígerð í eitt og hálft ár.

„Hérna úti tekur allt lengri tíma en heima, það er miklu meiri skriffinnska og rammi utan um allt."

Sigríður, Hrafnhildur og Kristín eru búnar að tryggja sér vörur eftir 25 unga og efnilega hönnuði, bæði íslenska og erlenda, sem verða til sölu í búðinni. „Við höfum trú á að íslensku hönnuninni verði vel tekið hérna en hún er bæði litríkari og kannski ekki eins klassísk og hin danska. Nú vonum við bara að Danirnir bíti á öngulinn."

Karrusel þýðir hringekja á dönsku en stöllurnar vilja að viðskiptavinir búðarinnar upplifi ákveðna veröld þegar þeir koma inn í verslunina. „Að fara inn í Karrusel á að vera skemmtileg upplifun og gefa kitl í magann þar sem þú finnur einstaka og fagra hluti allt í kring. Upplifunin á að skilja eftir sig ákveðin hughrif sem fólk tekur með sér úr versluninni."

Karrusel opnar þann 8. júní á Knabrostræde 1a en hægt er að fylgjast með búðinni á vefsíðunni Karruselboutique.com. -áp