Abidal byrjaður aftur að æfa með Barcelona

Það eru ekki bara slæmar fréttir af heilsu manna í Barcelona en eins og kunnugt er þá glímir þjálfarinn Tito Vilanova við krabbamein og lagðist undir hnífinn í dag. Franski bakvörðurinn Eric Abidal er nefnilega kominn aftur til baka eftir veikindi en hann var einnig að berjast við krabbamein.

Eric Abidal fékk nýja lifur fyrr á þessu ári og hefur verið í endurhæfingu undanfarna níu mánuði. Abidal lék síðast með Barcelona á móti Atletico Madrid 26. febrúar síðastliðinn.

„Hæ allir. Ég get staðfest það að ég er aftur byrjaður að æfa," skrifaði Eric Abidal inn á fésbókarsíðu sína.

Eric Abidal sendi líka þjálfara sínum baráttukveðjur en Vilanova þarf að gangast undir sex vikna lyfja- og geislameðferð eftir að krabbameinsæxli var fjarlægt í skurðaðgerð í dag.

„Ég vonast til að komast aftur fljótt inn á völlinn en ég get ekki hætt að hugsa um þjálfarann okkar Tito Vilanova. Ég óska honum og fjölskyldu hans mikil hugrekkis í þeirri baráttu sem er framundan," skrifaði Eric Abidal.