Nýtt myndband Alexanders Briem og B.G. Baarregaard frumsýnt á Vísi

Vísir frumsýnir hér myndband reykvíska tvíeyksins Baarregaard & Briem við lagið Love With You. Mennirnir á bakvið Baarregaard & Briem eru tónlistarmaðurinn B.G. Baarregaard, sem heitir réttu nafni Björn Gauti Björnsson, og söngvarinn og leikarinn Alexander Briem. Þetta er ekki í fyrsta skipti sem þeir leiða saman hesta sína því í sumar gáfu þeir út lagið Way Back in May sem vakti mikla lukku í ný-diskó-heimum, segir í tilkynningu. Þeir félagar hafa hug á áframhaldandi samstarfi en þó ekki í nánustu framtíð þar sem B.G. Baarregaard er upptekinn við tónlistarsköpun í Oslóarborg og Alexander Briem við leiklistarnám í Lundúnum. Leikstjóri myndbandsins er Harald Haraldsson og leikur fyrirsætan Vera Hilmars þar á móti söngvaranum Alexander Briem. Harald hefur vakið athygli að undanförnu fyrir verkefni sín fyrir Símann og Airwaves en þau má skoða á heimasíðu hans, haraldharaldsson.com.