Helmingur að troða upp

Borgarstjórinn, Jón Gnarr tróð upp á Iceland Airwaves á fimmtudagskvöldið ásamt Sigurjóni Kjartanssyni, en saman mynda þeir dúettinn Kleópötru.

Jón er þó ekki eini borgarfulltrúinn sem tróð upp á hátíðinni í ár því bæði Einar Örn Benediktsson og Óttarr Proppé koma fram með sínum hljómsveitum, Einar með Ghostigital og Óttarr með Dr. Spock og Ham. Aðstoðarmaður borgarstjórans, Sigurður Björn Blöndal, er einmitt líka í Ham. Helmingur borgarfulltrúa Besta flokksins og einn varaborgarfulltrúi koma því fram í ár, en ekki er vitað til þess að fulltrúar annarra flokka komi fram á hátíðinni í ár.

- fb, þeb