Jónas Guðni á reynslu til Vejle-Kolding

Danskir fjölmiðlar greina frá því að miðjumaðurinn Jónas Guðni Sævarsson sé á reynslu hjá Vejle-Kolding en liðið hafnaði í þriðja sæti b-deildarinnar á síðustu leiktíð.

Jónas Guðni, sem er samningsbundinn Halmstad, hefur verið úti í kuldanum hjá þjálfara sænska b-deildarliðsins undanfarna mánuði og treyst á tvo miðjumenn sem fengnir voru til félagsins fyrir tímabilið.

Samningur Jónasar Guðna rennur út í nóvember en hann sagði í samtali við Fréttablaðið á dögunum að hann hefði óskað eftir því að fá að ræða við önnur lið.