Björn Bergmann skoraði bæði í 2-1 sigri | Fimm mörk á fjórum dögum

Björn Bergmann Sigurðarson hefur verið sjóðheitur með norska liðinu Lilleström að undanförnu en í dag skoraði hann bæði mörkin í 2-1 sigri á Viking.

Þetta var fyrsti sigur Lilleström á tímabilinu og reyndar síðan 7. ágúst í fyrra. Hann var því afar kærkominn.

Björn Bergmann skoraði þrennu í 4-3 tapi gegn Brann á sunnudaginn og hefur því skorað fimm mörk á aðeins fimm dögum fyrir Lilleström. Hann hefur nú skorað sex mörk alls á tímabilnu.

Fyrra markið skoraði hann strax í upphafi leiksins en skot hans breytti reyndar um stefnu á Indriða Sigurðssyni, leikmanni Viking. Seinna markið skoraði hann eftir að hafa komist einn gegn markverði Viking.

Stefán Logi Magnússon var á bekknum hjá Lilleström en Pálmi Rafn Pálmason spilaði allan leikinn, sem og Björn Bergmann. Indriði spilaði allan leikinnj fyrir Viking.

Haugesund vann Álasund, 4-2. Andrés Már Jóhannesson var ónotaður varamaður hjá Haugesund.

Hönefoss vann svo góðan útisigur á Rosenborg, 1-0. Kristján Örn Sigurðsson og Arnór Sveinn Aðalsteinsson spiluðu allan leikinn í liði Hönefoss.