Sannfærandi hjá San Antonio gegn Utah

San Antonio Spurs vann öruggan 106-91 sigur á Utah Jazz í fyrstu viðureign liðanna í úrslitakeppni NBA-körfuboltans í kvöld.

San Antonio, sem ásamt Chicago Bulls náði bestum árangri allra liða í deildinni, ætlaði greinilega ekki að láta vonbrigði síðasta árs í úrslitakeppninni endurtaka sig. Líkt og í ár fór liðið inn í úrslitakeppnina sem efsta lið vesturdeildar en féll óvænt úr keppni gegn Memphis Grizzlies í fyrstu umferð.

Tony Parker var stigahæstur heimamanna frá San Antonio með 28 stig og átti auk þess flestar stoðsendingar allra á vellinum eða átta. Tim Duncan skoraði 17 stig og tók 11 fráköst.

Gordon Hayward skoraði 17 stig fyrir Utah sem tekur á móti San Antonio í öðrum leik liðanna í Salt Lake City á miðvikudag.