Rooney sendi Drogba pillu á Twitter

Það virðist eitthvað hafa farið í taugarnar á Wayne Rooney, leikmanni Manchester United, hversu oft Didier Drogba lá meiddur í grasinu í leik Chelsea og Barcelona á dögunum.

Drogba skoraði þá eina markið í óvæntum sigri Chelsea á Barcelona en hann eyddi þó miklum tíma í að emjast um í grasinu. Ávallt gat þó Drogba staðið upp og haldið áfram.

Rooney skrifaði þá á Twitter einföld en áhrifarík skilaboð: „Drogba. Þú ert góður leikmaður en vinsamlegast stattu upp."

Fleiri knattspyrnumenn og -spekingar tóku undir orð Rooney, eftir því sem kom fram í enskum fjölmiðlum. Drogba var þó hetja dagsins þegar uppi var staðið enda ekki á hverjum degi sem Evrópumeistarar Barcelona eru slegnir út af laginu.