NBA: Kobe missti af fyrsta leiknum í tvö ár og Lakers tapaði

Fjölmargir leikir fóru fram í NBA-deildinni í körfubolta í nótt. Los Angeles Lakers tapaði án Kobe Bryant, Boston Celtics vann flottan sigur á Indiana Pacers, Los Angeles Clippers er áfram í góðum gír eftir áttunda sigurinn í níu leikjum, Memphis Grizzlies vann Dallas Mavericks og Orlando Magic náði að enda fimm leikja taphrinu.

Shannon Brown, fyrrum Lakers-maður, skoraði 20 af 24 stigum sínum í þriðja leikhluta þegar Phoenix Suns vann Los Angeles Lakers 125-105. Kobe Bryant er meiddur á sköflungi og missti af sínum fyrsta leik síðan í apríl 2010 en Bryant var búinn að spila 138 deildarleiki í röð. Michael Redd skoraði 20 stig fyrir Phoenix og Steve Nash var með 13 stig og 11 stoðsendingar. Hjá Lakers var Pau Gasol með 30 stig og 13 fráköst og Andrew Bynum bætti við 23 stigum og 18 fráköstum.

Paul Pierce skoraði 20 stig og Ray Allen var með 19 stig þegar Boston Celtics vann Indiana Pacers öruggalega 86-72 á útivelli en Pacers-liðið var fyrir leikinn búið að vinna fjóra leiki í röð. Kevin Garnett var með 15 stig og Rajon Rondo gaf 12 stoðsendingar. Danny Granger skoraði 20 stig fyrir Indiana, David West var með 16 stig og Roy Hibbert tók 17 fráköst auk 9 stiga. Boston endaði með þessu tveggja leikja taphrinu og heldur forystunni í Atlanthafsriðlinum.

Rudy Gay var með 25 stig og Zach Randolph skoraði 15 stig og tók 11 fráköst þegar Memphis Grizzlies vann 94-89 heimasigur á meisturum Dallas Mavericks. Gilbert Arenas skoraði 14 stig fyrir Memphis sem vann sinn sjöunda leik í síðustu níu leikjum. Dirk Nowitzki var með 17 stig hjá Dallas og Brandan Wright skoraði 16 stig.

Dwight Howard var með tröllatvennu, 20 stig og 22 fráköst, þegar Orlando Magic endaði fimm leikja taphrinu með 88-82 sigri á Philadelphia 76ers. Glen Davis var með 23 stig og 12 fráköst og J.J. Redick skoraði 11 af 19 stigum sínum í fjórða leikhlutanum. Thaddeus Young skoraði 20 stig fyrir Sixers.

Blake Griffin skoraði 27 stig og tók 14 fráköst og Randy Foye bætti við 25 stigum þegar Los Angeles Clippers vann Sacramento Kings 109-94 á heimavelli sínum. Clippers-liðið er nú aðeins einum sigri á eftir nágrönnunum í Lakers í baráttunni um efsta sætið í Kyrrahafsriðlinum. Chris Paul var með 19 stig og 14 stoðsendingar en þetta var áttundi sigur Clippers-manna í níu leikjum. DeMarcus Cousins var með 15 stig og 20 fráköst hjá Sacramento.

Úrslit allra leikja í NBA-deildinni í nótt:

Indiana Pacers - Boston Celtics 72-86

Charlotte Bobcats - Atlanta Hawks 96-116

Philadelphia 76Ers - Orlando Magic 82-88

Memphis Grizzlies - Dallas Mavericks 94-89

New Orleans Hornets - Minnesota Timberwolves 99-90

Milwaukee Bucks - Portland Trail Blazers 116-94

Phoenix Suns - Los Angeles Lakers 125-105

Los Angeles Clippers - Sacramento Kings 109-94

Golden State Warriors - Denver Nuggets 112-97

Staðan í NBA-deildinni:Á nba.com eða yahoo.com