Skytturnar að norðan snúa aftur eftir sjö ára hlé

Rapphljómsveitin Skytturnar snýr aftur á föstudag eftir að hafa legið sjö ár í hýði. Nýtt efni verður á dagskrá sem varð til í vikulangri sumarbústaðaferð.

„Það er eins gott að fólk mæti. Annars gerum við þetta aldrei aftur," segir Hlynur Ingólfsson rappari og hlær, en hann og Heimir Bjéjoð úr norðlensku rappsveitinni Skyttunum ætla að binda enda á sjö ára fjarveru hljómsveitarinnar frá tónleikastöðum Reykjavíkur næstkomandi föstudag.

Þá munu þeir stíga á svið á Freyðibaðskvöldi Priksins ásamt Emmsjé Gauta og gefa aðdáendum sínum langþráð tækifæri til að berja þá augum.

Skytturnar gáfu út breiðskífuna Illgresið árið 2003. Sú fékk frábæra dóma og sama ár voru Akureyringarnir valin bjartasta vonin á Íslensku tónlistarverðlaununum. Hljómsveitarmeðlimir héldu stuttu síðar hver í sína áttina og því hefur lítið farið fyrir þeim á síðustu árum, fyrir utan stöku tónleika á Akureyri. Hlynur staðfestir þó að á Prikinu megi tónleikagestir eiga von á að heyra nýtt efni frá sveitinni.

„Við eyddum heilli viku í sumarbústað síðasta sumar og tókum upp nýtt efni þar. Við tökum örugglega eitthvað af því á tónleikunum."

Prikið er ekki stærsti tónleikastaður Reykjavíkur en Hlynur hefur ekki áhyggjur af plássleysi.

„Prikið er fullkomið fyrir þetta kvöld, það er svo langt síðan við höfum spilað að maður veit ekkert hverjir mæta. Ef það koma fáir verður það ekki vandræðalegt fyrir okkur af því að það þarf bara nokkrar hræður til að það sé fullt þarna. Ef það mæta margir myndast bara góður sviti."

Það virðist þó engin hætta vera á því að fámennt verði á Prikinu, því netheimar hafa logað af umræðum um endurkomuna síðan af henni fréttist. „Það er að myndast mikil spenna. Þetta verður klikkað, því skal ég lofa." - bb