Barnvæn vinnustofa

„Já, þetta er nýtt form á verslunarrekstri, að bjóða upp á opna vinnustofu fyrir foreldra og börn," segir Vala Magnúsdóttir, sem ásamt eiginmanni sínum kom barnaversluninni Ólátagarði á koppinn.

Vala hefur alla tíð unnið við það að hanna föndurpakkningar, allt frá unglingsaldri. Foreldrar hennar stofnuðu Völustein á sínum tíma og Vala kom þar að verslunarrekstri og var aðalhönnuður tímaritsins Fimir fingur. Vala lærði keramik og skúlptúr í Danmörku og stundaði nám á hönnunarbraut við Iðnskólann í Hafnarfirði.

„Við erum bæði með barna- og barnatengda vöru, svo sem frá Danmörku, Frakklandi og Þýskalandi. Einnig erum við með vörur eftir íslenska hönnuði."

Nýjungin felst í vörum sem Vala framleiðir og hannar og eru hálfkláraðar sem og föndurpakkningum úr hennar smiðju en þessar vörur eru hugsaðar fyrir foreldra til að skapa, til dæmis með börnum sínum, svokölluð Ólátagarðshönnun.

„Þetta eru alls kyns föndurpakkningar sem við höfum framleitt en mig langaði til að bjóða góða aðstöðu fyrir foreldra og gefa þeim tækifæri til að skapa sín eigin barnaherbergi og í vörulínunni er bæði hægt að kaupa hálfunna og tilbúna vöru. Nú fyrir jólin erum við svo með alls kyns jólaföndurpakkningar," segir Vala.

Bæði er hægt að vinna vörurnar á vinnustofunni eða taka þær með sér heim.

„Vinnustofan er líka hugsuð fyrir mæður í fæðingarorlofi sem langar kannski að útbúa barnaherbergið. Við erum til dæmis með skiptiaðstöðu og barnastóla. Þá er vinnustofan líka hugsuð fyrir barnaafmæli og saumaklúbba og hægt að bóka hana utan hefðbundins opnunartíma."

juliam@frettabladid.is