Tveir heimar mætast

Afrísk kúbanska súpergrúppan Afrocubism er væntanleg til Íslands til að halda tónleika í Eldborgarsal Hörpu 28. júní. Trausti Júlíusson kynnti sér þessa merku sveit og spáði í það hvers er að vænta á þessum stóra heimstónlistarviðburði.

Árið 1996 stóð til að úrval malískra tónlistarmanna flygi til Kúbu til að hitta nokkra af færustu söngvurum og hljóðfæraleikurum eyjunnar. Hugmyndin var að þessir hópar gerðu plötu sem blandaði saman tónlistarhefð landanna tveggja. Af ástæðum sem ekki eru á hreinu komu afrísku hæfileikamennirnir aldrei til Kúbu og í staðinn gerðu kúbönsku listamennirnir öðruvísi plötu. Sem betur fer segja sumir, því að sú plata, Buena Vista Social Club, seldist í milljónum eintaka og kom af stað heimstónlistarvakningu sem enn stendur yfir. Eftir útkomu Buena Vista Social Club jókst áhugi fyrir kúbanskri tónlist til muna. Á síðustu árum hefur malísk tónlist líka verið að gera það gott á heimsvísu.

Að fjórtán árum liðnumÞað var Nick Gold hjá World Circuit útgáfunni sem fékk hugmyndina árið 1996 og í fyrra, fjórtán árum seinna, datt honum í hug að láta hana verða að veruleika. Hann hóaði í nokkra eftirlifandi meðlimi Buena Vista klíkunnar og marga af frægustu tónlistarmönnum Malí og saman gerðu þeir plötuna Afrocubism sem kom út í október í fyrra. Á plötunni eru bæði lög eftir Kúbverjana og Malímennina og það verður að segjast að þessir tveir tónlistarheimar blandast mjög vel og útkoman er áheyrileg. Það kemur svo sem ekki á óvart, þar sem kúbönsk tónlist byggir að nokkru leyti á afrískri tónlist og tónlist frá Kúbu hefur lengi notið vinsælda í Vestur-Afríku, þ.á m. í Malí.

Hróarskelda og HarpaAfrocubism-platan sló samstundis í gegn hjá heimstónlistarunnendum og var á listum flestra heimstónlistarmiðla yfir bestu plötur ársins 2010. Í kjölfar útgáfunnar var blásið til mikillar tónleikaferðar sem enn stendur yfir. Á meðal viðkomustaða sveitarinnar í sumar eru fjölmargar tónlistarhátíðir, þ.á m. Hróarskelda og tónleikahús eins og Royal Albert Hall í London og Harpa í Reykjavík. Það er óhætt að hvetja unnendur bæði afrískrar og kúbanskrar tónlistar til þess að láta sig ekki vanta í Eldborg 28. júní.