Ber í sér vellíðan

Sigurlína Davíðsdóttir er ein þeirra sem hefur gengið hráfæði á hönd og finnst það hafa góð áhrif á heilsuna. Hún ver 15-20 mínútum í matargerð daglega og segir hráfæði síst dýrara en annað.

Ég þekkti mann sem hafði verið á hrá­fæði árum saman og gaf mér af og til að smakka. Mér fannst það gott. Hann var vel á sig kominn á fullorðinsárum og ég ákvað að mig langaði til að verða svona líka. Það réði úrslitum." Þannig lýsir Sigurlína Davíðsdóttir, prófessor við Háskóla Íslands þeirri hugarfarsbreytingu sem átti sér stað árið 2002 er hún ákvað að gerast hráfæðisæta. „Þegar ég var búin að prófa hráfæðið í viku fann ég að það bar í sér svo mikla vellíðan að mig langaði ekkert til baka."

Sigurlína kveðst alin upp á venjulegum sveitamat og miklum fiski og orðið gott af. „Síðan var ég grænmetisæta í mörg ár en það var ný og frábær upplifun að hætta að sjóða grænmetið."

Kássa úr hráum rótarávöxtum og hnetum og kæfa úr ólívum, lárperum og kryddi eru dæmi um rétti Sigurlínu. Hún telur hráfæði síst dýrara en annað og kveðst að jafnaði verja 15-20 mínútum á dag í matreiðslu. Hámarkshitastig við matargerðina er 45-48°C. „Markmiðið er að ensímin haldist óskert og líkaminn nýti sem minnsta orku til að melta en þess meiri til viðhalds og viðgerðar," upplýsir hún.

Sigurlína hefur þýtt bókina 12 spor til hráfæðis og telur auðvelt fyrir fólk að verða sér úti um þekkingu á slíkri matreiðslu. Þegar hún fer í veislur kveðst hún langoftast taka nesti með sér og gjarnan gefa öðrum að smakka. „Flestir þiggja það og verða alveg hissa þegar maturinn er ætur!“