Nowitzky keppir mögulega í tennis í sumar

NBA-stjarnan Dirk Nowitzky var nýlega skráður í tennisklúbb í heimalandi sínu, Þýskalandi, og kemur jafnvel til greina að hann muni keppa fyrir hönd félagsins í sumar.

Nowitzky skráði sig nýlega í TG Würzburg, lítinn tennisklúbb í nágrenni Frankfurt. Félagið leikur í deildarkeppni í Þýskalandi og vann nýlega 8-1 sigur á erkifjendum sínum í TSV Kleinrinderfeld - sama dag og Nowitzky skoraði sautján stig er lið hans í NBA-deildinni, Dallas Mavericks, sópaði meisturum LA Lakers úr úrslitakeppninni í NBA.

„Dirk vill ólmur koma hingað og spila," sagði Roland Mayer, leikmaður TG Würzburg, í samtali við þýska fjölmiðla. Mayer þekkir reyndar Nowitzky vel þar sem systir þess síðarnefnda er kærasta Mayer.

Tímabilinu lýkur í NBA-deildinni þann 16. júní næstkomandi og vonast Mayer til þess að hann fái tækifæri til að koma til Þýskalands og spila með liðinu.

„Ef það tekst mun allt fara á annan endann hér," sagði Mayer enn fremur.

Nowitzky þótti sjálfur efnilegur tenniskappi áður en hann sneri sér alfarið að körfuboltanum.