Besta erlenda platan 2009

Þegar Fréttablaðið leitaði til valinna sérfræðinga til að velja bestu erlendu plötur ársins 2009 kom í ljós að lítill samhljómur var meðal sérfræðinganna. Besta platan kom frá bandarísku borginni Baltimore.

Nokkuð jafnt er á toppnum í ár, aðeins eitt stig skilur að tvær efstu plöturnar. Eins og oft áður er breiddin mikil á listanum og mjög margar plötur fá aðeins eina tilnefningu.

Besta plata ársins er áttunda platan með Baltimore-sveitinni Animal Collective, Merriweather Post Pavilion. Platan hefur fengið gríðarlega góða dóma og er víða í efsta sætinu yfir bestu plötur ársins. Tónlistarlega er þetta poppaðasta plata þessarar tilraunaglöðu hljómsveitar, útkoman einhvers konar tuttugustu og fyrstu aldar samsuða úr barokk-poppi Beach Boys og sýrurokki Pink Floyd.

 

Í öðru sæti er Lundúnabandið The XX með frumraun sína XX. Platan sækir áhrif í nýbylgjurokk 9. áratugarins og Bristol-senuna í kringum 1995, er full af draumkenndri tónlist og var meðal annars valin besta plata ársins af gagnrýnendum The Guardian.

Í þriðja sæti er Bitte Orca með Dirty Projectors frá Brooklyn. Dave Longstreth er forsprakki sveitarinnar og tónlistin mjög frumleg blanda framúrstefnu, þjóðlaga- og heimstónlistaráhrifa og rokks. Björk, sem er andlega skyld sveitinni, tróð upp með henni á síðasta ári.

Annars virðist árið 2009 einna helst hafa einkennst af því að indíbylgja síðustu ára er í algleymi og alltaf fleiri og fleiri nöfn að koma upp á yfirborðið. Og yfirburðir Breta og Bandaríkjamanna eru algerir. Af ellefu efstu plötunum eru sex bandarískar og fimm enskar.

Bestu erlendu plötur ársins

1. Animal Collective - Merriweather Post Pavilion (19 stig)

2. The XX - XX (18 stig)

3. Dirty Projectors - Bitte Orca (16 stig)

4. Wilco - Wilco (The Album) (11 stig)

5. Grizzly Bear - Weckatimest (10 stig)

6. Bat For Lashes - Two Suns (9 stig)

7. - 8. Micachu and The Shapes - Jewellery (9 stig)

7. - 8. Muse - The Resistance (9 stig)

9. Mumford & Sons - Sigh No More (7 stig)

10. - 11. The Black Eyed Peas - The E.N.D. (7 stig)

10. - 11. Converge - Axe To Fall (7 stig)



Sérfræðingarnir: Alexandra Kjeld - Rjóminn, Andrea Jónsdóttir - Rás 2, Anna Margrét Björnsson - Fréttablaðið, Árni Þór Jónsson - Zýrður rjómi, Bob Cluness - Grapevine, Bobby Breiðholt - breidholt.blogspot.com, Brynjar Már Valdimarsson - FM 957, Dr. Gunni - Fréttablaðið, Egill Harðar - Rjóminn, Einar Bárðarson - Kaninn, Freyr Bjarnason - Fréttablaðið, Frosti Logason - Xið 977, Haukur S. Magnússon - Grapevine, Heiða Ólafsdóttir - RÚV/Poppland, Hildur Maral - Rjóminn, Höskuldur Daði Magnússon - Fréttablaðið, Jens Kr. Guð, Kjartan Guðmundsson - Fréttablaðið, Ólafur Páll Gunnarsson - Rás 2 og Trausti Júlíusson - Fréttablaðið.