Ardís úr Idol syngur einsöng

Ardís Ólöf Víkingsdóttir, sem lenti í fjórða sæti í fyrstu Idol-þáttaröðinni, útskrifaðist úr söngnámi í Bandaríkjunum fyrir tveimur árum. Hún syngur einsöng með Kammerkór Reykjavíkur í Kristskirkju í kvöld.

„Þegar ég var í Idolinu var ég að læra klassískan söng og það blundaði í mér að læra meira. Ég dreif mig út 2006 og var í námi til 2008," segir Ardís Ólöf, sem stundaði nám í bænum Princeton í New Jersey. „Þetta var rosalega góð lífsreynsla og það var gaman að prófa að búa annars staðar en á Íslandi. Þetta var hörkuerfitt en mjög skemmtilegt og ég sé ekki eftir því."

Áður en Ardís fór út í nám var hún af og til í poppinu auk þess sem hún söng í Litlu hryllingsbúðinni hjá Leikfélagi Akureyrar. Hún hefur ekki sagt skilið við poppið en klassíski söngurinn á þó hug hennar allan þessa dagana. Hún hlakkar mikið til tónleikanna í kvöld. „Við erum búin að æfa mjög mikið. Þetta verður rosa gaman. Ég hef aldrei sungið í þessari kirkju og ég hef heyrt að hljómburðurinn sé góður og henti þessari tónlist vel sem við erum að syngja."

Tónleikarnir í kvöld hefjast klukkan 20 og á efnisskránni er íslensk og erlend kirkjutónlist. Stjórnandi Kammerkórs Reykjavíkur, sem hóf aftur störf síðasta haust eftir tveggja ára hlé, er Sigurður Bragason. - fb