Frægir gefa gjafir

„Það væri dásamlegt ef íslenskir listamenn gætu sameinast og allir farið sama dag með fjölda pakka og sett undir tréð og glatt lítil hjörtu sem eiga um sárt að binda á Íslandi," var meðal annars það sem Tobba Marínós rithöfundur sendi á fjöldan allan af athafnafólki og listamönnum sem tóku vel í hugmyndina sem varð að veruleika þegar Egill Einarsson, Hrefna Rósa Sætran, Kalli í Baggalút, Ísgerður Gunnarsdóttir, Steindi, Þorgrímur Þráinsson, Sigrún Lilja Guðjónsdóttir og fleiri hittust í Smáralind og settu gjafir undir jólatréð þar.

Skoða má frábæra stemningu sem ríkti í hópnum í Smáralind í dag í meðfylgjandi myndasafni.

Pakkajól ganga eftir sem áður út á að allir sem vettlingi geta haldið gefa eina auka jólagjöf til þeirra sem minna mega sín um jólin. Gjafirnar eru miðaðar sérstaklega fyrir börn og nauðsynlegt er að setja merkispjöld á pakkana og merkja þannig gjöfina dreng eða stúlku og aldri. Nú skulum við taka höndum saman og gefa börnunum gjafir um jólin.