Fyrsta plata Reykjavíkursveitarinnar At Dodge City

Harðkjarna- og rokksveitin At Dodge City gefur á næstunni út sína fyrstu plötu sem nefnist As Our City Falls. Þrátt fyrir að vera ungir að aldri eru meðlimir sveitarinnar reynslumiklir og koma úr böndum á borð við Fighting Shit og Brothers Majere.

At Dodge City var stofnuð í Reykjavík sumarið 2008. Ári síðar fór sveitin í hljóðver og tóku upp sjö lög sem verða öll á nýju plötunni. Strákarnir annast útgáfuna alfarið sjálfir og ætla að selja plötuna á tónleikum og á Netinu.

Síðasta sumar fór hljómsveitin í vel heppnaða tónleikaferð um landið með rokkurunum í Nögl, Endless Dark og Gordon Riots. Fram undan eru tónleikar á Akureyri á föstudaginn og síðan áframhaldandi lagasmíðar og tónleikahald.

Á Myspace-síðu sveitarinnar má hlusta á nokkur gallhörð lög.