Sigurður: Flottur sigur

Sigurður Ingimundarson var ánægður með sigur sinna manna í Njarðvík á móti Grindvíkingum í kvöld.

Njarðvík vann leikinn, 74-67, eftir að hafa stungið af í þriðja leikhluta.

„Þetta var flottur sigur á móti liði sem á að heita það besta í deildinni. Grindavík er með mjög gott lið og við sýndum mikinn styrk með því að halda þeim niðri eins og við gerðum í kvöld," sagði Sigurður.

„Við eigum þó ýmislegt inni og getum við enn bætt okkur eins og væntanlega flest önnur lið í deildinni. En við vorum líka að gera margt mjög gott og áttum nokkra góða spretti í kvöld."