Rauða spjaldið stendur

Knattspyrnusamband Evrópu segir að ekkert sé hægt að gera til að draga rauða spjaldið sem Darren Fletcher fékk í leik Manchester United og Arsenal til baka.

Fletcher fékk að líta rauða spjaldið fyrir að brjóta á Cesc Fabregas í vítateig United. Víti var dæmt og Fletcher var vikið af velli.

Talsmaður UEFA hefur nú staðfest að vissulega geti United sent sambandinu kvörtun.

„En kvörtunin er aðeins tekin til greina ef dómarinn rak rangan leikmann af velli," sagði talsmaðurinn. „Það er ekki hægt að áfrýja ákvörðun dómarans á vellinum. Það er heldur ekkert sem bendir til þess að hann hafi rekið rangan mann af velli í leiknum," bætti hann við.

Alex Ferguson sagðist eftir leikinn í gær vonast til þess að dómararinn, Roberto Rosetti, sjái að sér og dragi rauða spjaldið til baka. En allt útlit er fyrir að Fletcher muni missa af úrslitaleik Meistaradeildar Evrópu sem fer fram í Róm þann 27. maí næstkomandi.