Búlgaríuplata tafðist í kreppu

Fyrsta plata hljómsveitar Hauks Gröndals, Narodna Muzika, tafðist í framleiðslu erlendis á síðasta ári og kom því ekki út fyrr en rétt fyrir jólin. „Svona þjóðlagamúsík er maður ekki að fara að selja eins og Bubbi Morthens hér á landi. Þeir eru ekki að setja þig í rosalegan forgang," segir hann og játar að vera pínulítið svekktur.

Haukur tók plötuna upp í apríl í Reykjavík og í september í Búlgaríu með þarlendum hljóðfæraleikurum en grunnurinn var lagður í ársbyrjun 2006. „Ég þurfti að finna „kontakta" og þurfti að taka einhverjar fimm til sex ferðir til Búlgaríu. Ég þurfti að finna rétta fólkið og hitti alls konar músíkanta sem ég var að læra hjá til að gera þetta eins vel og hægt var," segir Haukur, sem vann plötuna með harmonikkuleikaranum Borislav Zgurovski.

Haukur segir tímann í Búlgaríu hafi verið skemmtilegan að mörgu leyti. „Maður gat ímyndað sér að það versta hjá þeim væri yfirstaðið eftir fall kommúnismans en svo er eiginlega ekki. En ég kynntist hlýlegu fólki sem vildi allt fyrir mig gera, sem er ekki sjálfgefið. Þetta er gestrisið fólk sem tekur öllu fagnandi. Ég hef átt margrar ánægjulegar stundir og kynnst fullt af fólki sem ég hef samband við, þannig að þetta var mjög jákvæð upplifun." -fb