Morrissey átti að herma eftir Sigur Rós

Tónlistarmaðurinn Morrissey situr ásamt hljómsveit sinni nakinn fyrir innan í umslagi nýjustu smáskífu sinnar, I"m Throwing My Arms Around Paris.

Blaðamaður breska dagblaðsins The Guardian segir ljósmyndina smekklausa með öllu og telur að Morrissey hefði betur leitað til ljósmyndarans sem tók myndirnar á plötukápu Sigur Rósar, Með suð í eyrum við spilum endalaust.

„Hefur Morrissey tapað sínum listræna smekk? Eða þarf bara að ýta honum lítillega í rétta átt? Ef svo er get ég bent honum á frábæra ljósmynd Ryans McGinley sem var notuð með góðum árangri á umslagi nýjustu plötu Sigur Rósar. Ef þú vilt feta þessa slóð er þetta hárrétta aðferðin til að sýna nakta karlmenn á plötuumslagi,“ sagði hann.

Blaðamaðurinn, sem hingað til hefur hrifist mjög af plötuumslögum Morrissey, er ekki skemmt og heldur áfram: „Sá dagur þegar maðurinn, sem eitt sinn var leiðandi í gerð smekklegra plötuumslaga, leitaði innblásturs til Red Hot Chili Peppers er dagurinn sem tónlistin dó. Eða að minnsta kosti fékk hún sér vænan blund með hjálp svefnlyfja.“

-fb