Metallica meðal stóru nafnanna á Sonisphere

Bandaríska þungarokksveitin Metallica verður aðalnúmerið á nýrri tónlistarhátíð í Hertford-skíri á Englandi í sumar.

Nýja hátíðin rís úr ösku hinnar fornfrægu Knebworth-tónlistarhátíðar en á henni tróð Led Zeppelin meðal annars upp fyrir réttum 30 árum. Nú stendur til að koma á fót heilmikilli samevrópskri tónlistarveislu undir heitinu Sonisphere og verður Knebworth-hátíðin eins konar Englandsdeild þeirrar hátíðar.

Ætlunin er að byrja með látum en hátíðin verður haldin í ágúst eins og margar atkvæðamiklar rokkhátíðir. Það eru enda engir aukvisar sem hafa valist til að hleypa þessu þrekvirki af stokkunum. James Hetfield og félagar í Metallica mæta ótrauðir til leiks en af öðrum listamönnum sem boðað hafa komu sína er bandaríska nýmálmsveitin Linkin Park auk Guns´n´ Roses, Foo Figthers og bresku rokktröllanna Iron Maiden.

Einn af skipuleggjendum Sonisphere, sem hefur þó ekkert með raftækjaframleiðandann Sony að gera, segir stefnuna vera að tefla fram 12 til 14 stórum nöfnum ár hvert og láta annað mæta afgangi. Það sé einfaldlega frekar bragðdauft að fara á tónlistarhátíðir þar sem margir tugir hljómsveita troði upp en engin þeirra skilji neitt sérstakt eftir.