Ef hann fer þá er það til okkar

Silvio Berlusconi, forseti AC Milan, segir að ef Ronaldinho fari frá Barcelona þá verði það til AC Milan. Sá brasilíski er ósáttur í herbúðum Börsunga og allt útlit fyrir að hann yfirgefi liðið í sumar.

„Við gerum allt sem við getum til að fá Ronaldinho. Hann hefur sagt við okkur að ef hann fari þá komi hann til okkar. Ástæðan er ekki síst sú að við höfum brasilíska leikmenn sem vilja fá hann," segir Berlusconi.

Umboðsmaður Ronaldinho sagði þó í dag að það væri ekkert víst að leikmaðurinn færi frá Barcelona í sumar enda samningsbundinn til 2010.

Chelsea, Inter, Juventus og Manchester City fylgjast þó spennt með gangi mála þó Berlusconi telji að AC Milan sé eina liðið í kapphlaupinu.