Októberfest í fimmta sinn

Októberfest verður haldin í fimmta sinn á lóð Háskóla Íslands frá fimmtudegi til laugardags. Hátíðin hefur aldrei verið stærri og hefur Stúdentaráð fengið viðburðafyrirtækið Am Events sér til aðstoðar við að gera hátíðina sem glæsilegasta þetta árið. Tveimur risatjöldum hefur verið bætt við hið hefðbundna tjald hátíðarinnar og þar að auki verða haldnir stórtónleikar á laugardeginum. Þar koma fram Mugison, Dikta, Who Knew, Mammút og Agent Fresco.

Þýskt þema verður á hátíðinni og verður meðal annars keppt í þýskri búningakeppni, horft á þýskt sjónvarpsefni og drukkið úr stígvéli.