Spila án Plants

Rokksveitin Led Zeppelin er á leið í tónleikaferð en söngvarinn Robert Plant verður ekki með í för. Bassaleikarinn John Paul Jones sagði í samtali við BBC að Plant hafi ákveðið að fara ekki með og nýs söngvara væri nú leitað.

Eftirlifandi meðlimir Led Zeppelin komu sem kunnugt er aftur saman á stórtónleikum í O2-höllinni í London í desember í fyrra. Eftir það hafa sögusagnir verið á kreiki um að hljómsveitin myndi halda í tónleikaferðalag. Jason Bonham, sonur trommarans sáluga, Johns Bonham, spilaði með sveitinni á þeim tónleikum og verður með áfram. Þeir Jones, Bonham yngri og gítarleikarinn Jimmy Page eru ákveðnir í að sá söngvari sem fer með þeim í reisuna verði ekki eins og hann.

„Þetta verður að passa. Það er tilgangslaust að leita bara að öðrum Robert," segir Jones. Ekki hefur fengist upplýst hvenær umrætt tónleikaferðalag er fyrirhugað.