Páll Gunnar Ragnarsson, einn af eigendum skemmtistaðarins 22 við Laugaveg, og Gunnar Már Þráinsson hafa fest kaup á Organ í Hafnarstræti.
Samkvæmt heimildum Fréttblaðsins verður staðurinn opnaður á meðan á tónlistarhátíðinni Iceland Airwaves stendur dagana 15. til 19. október. Eftir hana hefst undirbúningur að veglegri opnun sem verður mánaðarmótin þar á eftir.
Heyrst hefur að klúbbastemning muni ráða ríkjum á nýja staðnum í anda skemmtistaðanna Thomsen og Kapital sem nutu vinsælda fyrir nokkrum árum. Við hliðina á Organ er einmitt klúbbastónlist í hávegum höfð á Tunglinu og sé þessi orðrómur á rökum reistur eiga þessir tveir staðir eftir að berjast hartammlega um gesti í framtíðinni.
Þorsteinn Stephensen, skipuleggjandi Iceland Airwaves, er ánægður með að fá afnot af Organ á meðan á hátíðinni stendur. „Við höfðum miklar áhyggjur af því að þetta myndi lenda í miklum ógöngum en þetta eru góðar fréttir og við óskum þeim alls hins besta," segir hann.
Tæpur mánuður er liðinn síðan Organ lagði upp laupana með miklum hvelli vegna deilna sem stóðu yfir um greiðslu á leigu og um aðrar vanefndir rekstaraðilans. Lýsti Inga Sólveig Friðjónsdóttir, þáverandi eigandi staðarins, því yfir að reksturinn stæði ekki undir sér og efaðist um að hægt væri að reka slíkan tónleikastað nema með ríkisstyrkjum.
Ekki náðist í nýja eigendur Organs við vinnslu fréttarinnar. -fb
