Rokkabillybandið 20 ára

20 ára afmæli Rokkabillybandsins er fagnað með langþráðri plötu.

„Það var alltaf pæling að gefa út plötu og við ákváðum loksins að kýla á það,“ segir Tómas Tómasson, söng- og gítarleikari Rokkabillybands Reykjavíkur, um nýútkomna plötu sveitarinnar, Reykjavík, en sveitin fagnar jafnframt tuttugu ára starfsafmæli sínu um þessar mundir.

„Fyrsta giggið okkar var vorið 1988 og eftir það vorum við að í fimm ár stanslaust, eða til 1993. Þá flutti einn meðlimur hljómsveitarinnar af landi brott og við tók langt hlé,“ útskýrir Tómas sem fylgir nú plötunni eftir með tónleikaferðalagi um Ísland. „Við erum búnir að spila fyrir vestan og á Austfjörðum, en næst er stefnan tekin norður á Sauðárkrók, Akureyri og Húsavík, auk fleiri staða á Suðurlandi. Við vorum búnir að bóka Organ, en það fór sem fór þegar staðurinn lokaði nýverið, svo við erum að skoða hvert við færum okkur.“

Spurður hvað taki við að tónleikaferðalaginu loknu segir Tómas vera hug á að koma nýju efni bandsins yfir á ensku. „Það er mikil rokkabillyvakning úti um allan heim og mikið af tónlistarhátíðum sem við viljum spila á í framhaldinu, svo við ætlum jafnvel á túr í Skandinavíu í vor og þreifa á útgáfu erlendis í kjölfarið, en fyrst þarf að koma efninu yfir á ensku. Við ætlum samt ekki að gera þetta í rosalegum hasar heldur vinna í þessu jafn og þétt.“ - ag