Stórbók og fleiri gersemar

Viðhafnarútgáfur af ýmsu tagi hafa verið algengar í tónlistarútgáfu undanfarin ár og verða sífellt íburðarmeiri. Trausti Júlíusson spáði í þróunina og skoðaði nýja spariútgáfu Sigur Rósar-plötunnar Með suð í eyrum við spilum endalaust.

Viðhafnarútgáfur hafa verið algengar í tónlistarútgáfu undanfarin ár.

Algengast er að gefa út afmælisútgáfur af eldri verkum eða veglegar yfirlitsútgáfur, en upp á síðkastið hefur færst í aukana að búa til spariútgáfur af nýjum plötum líka. Þegar Sigur Rós var að klára Með suð í eyrum við spilum endalaust í vor ákvað sveitin að hafa sjálfa plötuna í mjög einföldum umbúðum en leggja þess í stað þeim mun meira í viðhafnarútgáfuna sem átti að koma út um haustið. Hún er nú komin og það verður að segjast eins og er að þetta er engin venjuleg útgáfa.

Stóra stássstofubókin

Viðhafnarútgáfan af Með suð í eyrum er í raun 200 bls. innbundin myndabók í stóru broti (24 x 30 cm). Aftast í henni eru svo tveir vasar fyrir plötuna sjálfa og DVD-diskinn sem fylgir með. Þetta er myndabók og efniviðurinn er gerð plötunnar, fyrstu tónleikarnir á tónleikaferðinni, Náttúruhljómleikarnir o.fl. Ljósmyndarinn Eva Vermandel fylgir sveitinni í gegn um allt ferlið og myndirnar sýna m.a. upptökur, tónleika, æfingar, partí og myndbandagerð. Á DVD-disknum eru tvær kvikmyndir eftir Nicholas Abrahams, Við spilum endalaust, sem fæst við sama efni og ljósmyndabókin, og Árabátur at Abbey Road sem fjallar um upptökur á laginu Árabátur með sinfóníuhljómsveit og drengjakór. Auk þess er myndbandið við lagið Gobbledigook á disknum.

Bókin er í takmörkuðu upplagi og hvert eintak númerað. 300 eintök fara í sölu hér á landi. Hverri bók fylgir líka filmubútur úr upprunalegu filmunni sem Gobbledigook myndbandið var gert úr. Bókina var hægt að panta í forsölu á vef Sigur Rósar. Þeir sem það gerðu fengu nafn sitt prentað á þakkarlista í bókinni sjálfri. Það er skemmtilegt hvað það leynast snjallir markaðsmenn í herbúðum þessara ljúfu og hálfheilögu manna.

Gdansk-röð Davids Gilmour

Það hefur líka færst í aukana að gefa samhliða út margar mismunandi útgáfur af sama titlinum. Gott dæmi um þetta er tónleikapakkinn Live in Gdansk með David Gilmour. Hann kemur í fimm mismunandi útgáfum, sú dýrasta hefur að geyma 3 CD og 2 DVD og kostar tæpar tíu þús. kr. á Amazon. Tónleikarnir eru reyndar mikið eyrnakonfekt fyrir Gilmour- og Pink Floyd-aðdáendur. Roxy Music-gítarleikarinn Phil Manzanera spilar með karlinum og svo eru þetta líklega síðustu upptökur hljómborðsleikarans Ricks Wright sem lést á árinu.

Brjálaðir Dylan-aðdáendur

En það eru ekki allir jafnhrifnir af viðhafnarútgáfum. Þegar áttunda Bootleg Series-plata Bobs Dylan, Tell Tale Signs, kom út í haust fékk hún allstaðar frábæra dóma. Meðaleinkunn hennar hjá yfirlitssíðunni Metacritic er t.d. 86/100. Ef maður skoðar plötuna hins vegar á Amazon kemur í ljós að meðaleinkunn notenda þar er bara tvær og hálf stjarna af fimm. Ástæðan er ekki sú að Dylan-aðdáendum mislíki tónlistin heldur eru þeir æfir yfir því að þriggja diska munaðarútgáfan kosti 85 pund (18 þús. kr.). Slíkt okur vilja gamlir Dylan-menn ekki láta bjóða sér! Til samanburðar má geta þess að Sigur Rósar-bókin kostar tæpar tíu þúsund hér á landi sem er nokkru lægra verð heldur en í Bretlandi.