Grant: Góð afmælisgjöf fyrir Roman

Avram Grant fagnaði því að hans menn í Chelsea spiluðu góðan fótbolta gegn Schalke í kvöld og óskaði líka Roman Abramovic til hamingju með afmælið.

Chelsea vann Schalke í kvöld, 2-0, í Meistaradeild Evrópu.

„Í dag á Roman Abramovich 41 árs afmæli þannig að sigurinn er góð afmælisgjöf fyrir hann. Hann á þetta skilið en hann hefur gert svo mikið fyrir liðið og stuðningsmenn þess. Ég óska honum til hamingju með daginn.“

Grant sagði að það hafi verið mikilvægt að byrja vel í leiknum í kvöld. „Við gerðum það. Ekki bara vegna þess að við skoruðum snemma heldur þar sem við spiluðum góðan fótbolta.“

Hann segir að síðan hafi leikmenn tekið því rólega en skorað svo aftur í upphafi síðari hálfleiks. „Það mikilvægasta er þó að við unnum og höldum áfram að bæta okkar leik.“