Smith: Enginn bjóst við þessu

Walter Smith, knattspyrnustjóri Glasgow Rangers, viðurkennir að vera furðu lostinn eftir að lið hans vann frönsku meistarana í Lyon 3-0. Skoska liðið hefur nú unnið báða leiki sína í Meistaradeildinni.

„Þetta voru stórkostleg úrslit, eitthvað sem enginn bjóst við. Þetta hlýtur að fara í hóp með bestu úrslitum félagsins frá upphafi. Frammistaða leikmanna var í einu orði sagt frábær," sagði Smith.

„Sjálfstraust okkar jókst eftir því sem leið á leikinn. Við megum samt ekki missa okkur í fögnuði. Næstu tveir leikir okkar í keppninni eru gegn Barcelona og við þurfum að leika enn betur þar til að fá stig."