Dómaraskotin verða fastari

Sjötta úrslitakvöldið í X-Factor fer fram í beinni útsendingu frá Vetrargarðinum í Smáralind á morgun föstudag. Sjö atriði eru eftir og margir eru á því að línur séu farnar að skýrast.

Í síðastu umferð var það Johanna hin sænska sem féll úr keppni. Hún hafnaði í öðru af tveimur neðstu sætunum, ásamt dúettnum Gís. Þegar kom til þess að dómarnir þyrftu að gera upp á milli þeirra þá valdi Ellý vitanlega að senda Gís heim og halda Johonnu sinni og Palli valdi að senda Johonnu heim og halda Gís-hópnum sínum. Það kom því í hlut Einar Bárðarsonar að fara með úrslitavaldið, enn og aftur. Eftir talsverða íhugun ákvað Einar að senda Johonnu heim.

Einar lýsir því í bloggi sínu, bæði í Idol-blogginu á www.minnsirkus.is og á heimasíðu sinni, að þessi erfiða ákvörðun hans hefði ráðist af því að Johanna væri einfaldlega búinn að lenda of oft í tveimur neðstu sætunum, auk þess sem hún klikkaði illa á textanum í viðlaginu á flutningi lagsins "With or Without You" með U2. Einar bendir á að hann hafi tvisvar sinnum verið búinn að leysa Johonnu úr snörunni, en nú hafi tími hennar einfaldlega verið kominn. En í bloggi sínu, sem hann ritaði eftir þáttinn, bendir hann á að hann telji þetta brösótta gengi Johonnu ekkert hafa með hana að gera: "Ef hún hefði verið okkar hópi hefðum við farið aðra leið og þá sérstaklega aðra leið í lagavali. Ég er viss um að hún hefði náð miklu betri árangri með okkur." Þar beinir Einar augljóslega spjótum sínum að Ellý og hennar fólki og skellir sumpart skuldinni á taktík þeirra. Spennandi verður að sjá hvort Ellý svari fyrir þessar ásakanir; fullyrðingar Einars um að Johonnu hefði verið betur borgið undir hans handleiðslu. Þá segist Pall sannfærðum um í bloggi sínu að Johanna þurfi engar áhyggjur að hafa, þótt hún sé fallin úr þessari keppni, hún semji sín eigin lög og að öll slík sköpun veiti á gott.

Palli furðar sig einnig í bloggi sínu á því hvers vegna þjóðin skuli ekki meta Gís-dúettinn af meiri verðleikum en raun ber vitni. Tvisvar sinnum hafa þær vinkonur hafnað í tveimur neðstu sætunum en Palli segir af og frá að það hafi nokkuð með það að gera að fólk telji þær skorta sönghæfileika. "Það fer ekki á milli mála að Gís stelpurnar, Guðný Pála og Íris Hólm, eru brjálæðislega góðar söngkonur. Það datt því af mörgum andlitið - og mér líka - þegar þær reyndust vera meðal tveggja neðstu ásamt Jóhönnu." En Palli er með kenningu um það hver vandi þeirra er. Hann telur þær eiga við "ímyndarvanda" að glíma. Að allir hinir keppendurnir hefðu skapað sér ímynd - á meðan ímynd Gís væri ekki eins augljós. Það sýndi mikilvægi ímyndarinnar, hversu nauðsynlegt það væri að finna sér hlutverk í svona keppni. En Palli segir klárt mál að Gís hafi ímynd og það sterka ímynd; þær væru einu rokksöngraddirnar í keppninni og því væru þær "rokkgellurnar" eða "the rock chicks", eins og hann kallar þær sjálfur. "Þær eru einu söngraddirnar sem geta blastað og beltað erfiðustu rokklögum mannkynssögunnar. Þetta er þeirra sérstaða í X-Factor keppninni."