Sumartónleikar tvítugir

Á þessu sumri eru tuttugu ár liðin síðan Laufey Sigurðardóttir fiðluleikari hratt Sumartónleikum á Mývatni af stað. Þessi menningarauki fyrir heimamenn og gesti hefur árlega glætt sumarnóttina tónabirtu þó atriðin hafi mörg verið flutt af fáum en vel sótt.

Vegna afmælisársins verður efnt til þriggja daga hátíðar um komandi helgi og því ekki ráð nema í tíma sé tekið fyrir þá sem vilja leggja land undir fót og hópast norður í Mývatnssveit. Sóknarnefnd Reykjahlíðarkirkju hefur keypt flygil sem tekinn verður í notkun við hátíðlega athöfn á föstudagskvöld kl. 20.30. Þar flytur ávarp Pétur Snæbjörnsson, formaður sóknarnefndar, sr. Örnólfur Ólafsson fer með blessunarorð. en síðan er tónlistarflutningur: Sólveig Anna Jónsdóttir, píanó, Laufey Sigurðardóttir, fiðla, Sveinn Hjörleifsson, tenór, Margrét Bóasdóttir, sópran, flytja blandað prógram.

Á laugardagskvöldið kl. 21 mun jafnaldri Sumartónleikanna og þátttakandi í upphafstónleikunum 1987, þá reyndar í móðurkviði, Benedikt Kristjánsson, tenór, syngja við píanóleik Sólveigar Önnu Jónsdóttur. Benedikt lauk framhaldsprófi í söng frá Tónlistarskólanum í Reykjavík nú í vor. Sólveig Anna er Akureyringur og vel þekktur tónlistarmaður um allt land. Á efnisskrá eru íslensk sönglög, ítalskar aríur og ljóðasöngvar eftir Grieg, Schubert og Fauré.

Sunnudaginn 8. júlí kl. 14.00 verður í fyrsta sinn almenn guðsþjónusta í Bænhúsinu á Rönd við Sandvatn, en bænhúsið er gert eftir teikningum af miðaldakirkjunni í Reykjahlíð. Prófastur Þingeyjarprófastdæmis, Jón Ármann Gíslason, ásamt sóknarpresti, Örnólfi Ólafssyni, Sighvati Karlssyni og Kristjáni Val Ingólfssyni annast messuna og kirkjukórar í Mývatnssveit syngja. Þetta er í fyrsta sinn sem almenningi gefst kostur á að koma að bænhúsinu, sem er eftirlíking miðaldakirkjunnar í Reykjahlíð, teiknuð af Herði Ágústssyni, arkitekt.

Bænhúsið er í einkaeign á landareign Randar við Sandvatn, vestan Mývatns. Messugestir eru beðnir að klæðast samkvæmt veðri. Gott er að taka með sér tjaldstól, þar sem messan fer að mestu fram utandyra. Prestar; sr. Jón Ármann Gíslason, prófastur, Örnólfur Ólafsson, Sighvatur Karlsson og Kristján Valur Ingólfsson. Kórar Reykjahlíðarkirkju og Skútustaðakirkju syngja.

Tónlist: Ástríður Pétursdóttir, klarinett og Benedikt Kristjánsson tenór. Söngstjóri er Margrét Bóasdóttir en hún er listrænn stjórnandi Sumartónleika í Mývatnssveit þetta árið en næstu helgar verða þar í boði tónleikar af ýmsum toga.