Skemmtileg og einföld íþrótt fyrir almenning

Frisbígolf, folf, er fyrirbæri sem fer ekki mikið fyrir á Íslandi þótt það sé bráð­skemmtileg íþrótt sem allir ættu að geta stundað.

„Frisbígolf er golf sem hefur verið yfirfært á frisbídiska og er orðið alþjóðlegt fyrirbæri sem keppt er í á heimsvísu. Í fyrrasumar var haldið alþjóðlegt mót hérna á Íslandi og svo hafa nokkrir Íslendingar farið utan að keppa fyrir hönd landsins. Þetta er ekki orðið eins þekkt og golfið en það er til heimslisti þannig að allar svoleiðis græjur eru í gangi," segir Ásgeir Hreiðarsson framkvæmdastjóri Hamra, útilífs- og umhverfismiðstöðvar skáta. Á tjaldsvæði Hamra er frísbígolfvöllur.

Grundvallarreglurnar eru nokkuð svipaðar venjulegum golfreglum. Frisbígolf er þó þægilegra að því leytinu til að ekki þarf að leigja eða kaupa mikinn búnað til þess að geta spilað. „Það er hægt að spila þetta með venjulegum frisbídiskum en það er samt betra að vera með sérhannaða diska. Það er mikið úrval til af slíkum diskum og það kostar á bilinu þrjú til fimm þúsund krónur að koma sér upp grunnsetti til þess að fara að spila þetta af alvöru," segir Ásgeir.

Nokkrum frisbígolfvöllum hefur verið komið upp á síðastliðnum árum og viðræður eru í gangi um að gera fleiri, að sögn Birgis Þórs Ómarssonar, formanns Íslenska frisbígolfsambandsins. Vellirnir eru umhverfisvænir þar sem notast er við náttúrulegt umhverfi og til dæmis eru tré og runnar notuð sem náttúrulegar hindranir í brautunum.

Ókeypis er að spila á frisbígolfvöllum og þeir eru öllum opnir. Bæði börn og fullorðnir eiga að geta spilað án teljandi vandkvæða. Folf er því tilvalin almennings­íþrótt þar sem sameinast skemmtileg og góð hreyfing, útivist og samvera með öðrum.

Í sumar geta þeir sem vilja kynnast þessu sporti komið á laugardagsmorgnum á milli 10-12 á völlinn í Gufunesi og fengið leiðsögn.