Syngja fyrir umhverfið

Umhverfisverndarsamtökin Saving Iceland standa fyrir stórtónleikum á Nasa til styrktar ráðstefnu um umhverfisvernd í byrjun næstu viku. Meðal þeirra sem koma fram eru múm, Rúnar Júlíusson og Bogomil Font.

„Við viljum vekja athygli á því að þó að Kárahnjúkavirkjun sé komin í gagnið er hellingur af nýjum virkjunum á teikniborðinu. Bara í síðustu viku var talað um fjóra eða fimm mögulega staði fyrir ný álver," segir Jason Slade, einn skipuleggjandi tónleikanna, sem vonast til þess að tónleikarnir verði til þess að fá fleiri til að taka þátt í baráttunni fyrir náttúru Íslands.

Meðal þeirra sem koma fram á tónleikunum á mánudagskvöld eru Rúnar Júlíusson, múm, Reykjavík!, Skátar, Ólöf Arnalds, Magga Stína og Evil Madness.

Tónleikarnir eru haldnir til að styrkja ráðstefnuna Náttúran - Áhrif stóriðju og stórstíflna sem verður haldin á Hótel Hlíð í Ölfusi 7.-8. júlí. Aðgangur á ráðstefnuna er ókeypis.

„Það koma hingað fyrirlesarar frá fimm heimsálfum og tólf löndum sem hafa verið að mótmæla framkvæmdum Alcan og Alcoa í sínum heimalöndum," segir Sigurður Harðarson, betur þekktur sem Siggi pönk, annar skipuleggjandi tónleikanna. „Við erum að halda þessa ráðstefnu til að grasrótarhóparnir hér heima fái tengingu við það sem er að gerast úti í heimi. Þetta er alþjóðleg barátta sem við stöndum í."

Auk erlendu ráðstefnugestanna munu Andri Snær Magnason, Guðbergur Bergsson, Ómar Ragnarsson og margir fleiri halda fyrirlestra.

Tónleikarnir á Nasa á mánudaginn hefjast kl. 20 og húsið opnað hálftíma áður. Aðgangseyrir er 2.500 kr. og allir listamennirnir sem koma fram gefa vinnu sína.

Allar nánari upplýsingar má finna á vef samtakanna www.savingiceland.org.