Söngveröld við Mývatn

Árleg kórastefna fer fram við Mývatn nú í vikunni og stefnir fjöldi söngfólks þangað til að stilla saman sína tónlistarstrengi. Að þessu sinni liggja fyrir tvö stór verkefni auk þess sem þátttökukórarnir munu syngja fjölbreytt efni á þrennum tónleikum. Hátíðin stendur yfir frá 7.-10. júní.

Á fimmtudaginn verða tón­leikar í félagsheimilinu Skjólbrekku en þar syngja Kvennakór Akureyrar og Kammerkór Norður­lands. Daginn eftir verða tón­leikar á harla óvenjulegum stað; þá syngja kórarnir Sálubót, Uppsveitasystur, Vestfirsku valkyrjurnar og Kvennakór Akureyar í hvelfingu Laxár­stöðvar í Aðaldal en þar er víst afbragðs hljómburður.

Lokatónleikarnir fara síðan fram í íþróttahúsinu í Reykjahlíð á sunnudaginn en þá verður frumflutt messan „Mass of the Children“ eftir tónskáldið John Rutter. Þátttakendur verða um áttatíu söngvarar úr blönduðum kórum víðs vegar af landinu, Stúlknakór Akureyrarkirkju og einsöngvarnir Halla Dröfn Jónsdóttir og Ásgeir Páll Ágústsson. Sinfóníuhljómsveit Norðurlands leikur undir stjórn Guðmunduar Óla Gunnarssonar.

Sérstakur gestur stefnunnar að þessu sinni er bandaríski kórstjórnandinn Lynnel Joy Jenkins en hún mun stýra rúmlega hundrað félögum úr kvennakórum landsins sem flytja munu heimstónlist úr öllum áttum á lokatónleikunum. Lögin verða öll flutt á frummáli sínu en þau eru meðal annars frá Kína, Rússlandi og Suður-Afríku.

Listrænn stjórnandi kórastefnunnar er Margrét Bóasdóttir.