Vilja endurreisa Rósenberg

Tvennir tónleikar undir yfirskriftinni Reisum Rósenberg verða haldnir um helgina til að stuðla að uppbyggingu tónleikastaðarins Café Rósenberg, sem skemmdist illa í bruna á dögunum.

„Við höfum fengið æðislegar viðtökur alls staðar og bjuggumst alls ekki við þessu,“ segir Birgitta Káradóttir, sem skipuleggur tónleikana. Hún segir afar mikilvægt að rekstur Rósenberg haldi áfram. „Það er ekki hægt að flokka Rósenberg sem skemmtistað heldur er þetta fyrst og fremst menningarstaður og hann hefur gert mikið fyrir tónlistarmenninguna.“

Báðir tónleikarnir verða haldnir í Loftkastalanum. Þeir fyrri verða í kvöld klukkan 21.00 og þar koma meðal annars fram KK og Frakkarnir, Villi Naglbítur, Tómas R. Einarsson og Halli Reynis. Á síðari tónleikunum annað kvöld, sem hefjast klukkan 20, verða Megasukk, Sviðin jörð, Helgi Valur og Andrea Gylfadóttir á meðal flytjenda.

Aðgangseyrir er 2.000 krónur ef keyptur er miði á aðra tónleikana en 3.000 ef keypt er á báða. Miðapantanir eru í síma 863-5591 (Birgitta) og 697-8203 (Sara).