Kristján í úrslit trúbadorkeppni

„Þeir sem keppa til úrslita eru, og fyrst ber að nefna sjálfa stjörnuna Kristján Þorvaldsson, en aðrir eru Einar Örn Konráðsson, Andri Már Sigurðsson og síðust til að komast í úrslitin er Ísabella Magnúsdóttir,“ segir Friðrik Indriðason, blaðamaður og helsti skipuleggjandi Stóru trúbadorkeppninnar á Sportbarnum.

Keppnin sú hefur nú staðið yfir í rúman mánuð fyrir troðfullu húsi að sögn Friðriks. Haldin hafa verið fjögur undanúrslitakvöld og nú er komið að sjálfu úrslitakvöldinu. Sem haldið verður með pomp og prakt næsta laugardagskvöld.

Að sögn Friðriks stefnir í hörkukeppni. Sjálfur á hann vart orð í eigu sinni þegar hæfileikar Ísabellu koma til tals. „Gríðarlegt efni þar á ferð og leikur aðeins frumsamið. Hún er með hundrað tattú um allan líkamann og algört beib. Þú verður bara að sjá þetta til að trúa því.“

úettinn Sviðin jörð, frændurnir Magnús Einarsson og Freyr Eyjólfsson, skemmta gestum keppninnar ásamt Hirti Howser harmónikuleikara með meiru. Friðrik hvetur menn til að mæta tímanlega því hann býst við troðfullu húsi. Friðrik, sem hefur að undanförnu einbeitt sér að störfum sem falla undir verksvið skemmtanastjóra, hefur ýmis járn í eldinum til skemmtunar barflugum borgarinnar. Þannig er hann nú að undirbúa sviðakjammakeppni sem ekki er tímabært að greina frá að svo stöddu.-